Pishat e Gurit të Prerë

Formojnë një pyll me sipërfaqe rreth 30 ha. Ato janë zhvilluar në reliev kryesisht paramalor, me lartësi 1200 – 1352 m mbi nivelin e detit dhe përbërje flishore të paleogjenit, me mbizotërim të ranorëve dhe argjilave. Përfshihet në zonën klimatike mesdhetare malore. Disa përroska përshkojnë sipërfaqen pyjore. Tokat janë të murrme pyjore dhe të pasura me humus. Pylli formon një ekosistem interesant me vlera shkencore, sidomos biologjike: 10 lloje drurësh si pisha e zezë, bunga, dëllinja e zezë, shkoza dhe bimë të tjera: fier, shpendër, luleshtrydhe, etj. Lartësia mesatare e drurëve arrin 18 m, ndërsa më e larta 22 m; diametri mesatar i trungut 32 cm, ndërsa më i madhi 38 cm; mosha mesatare 127 vjet dhe me e vjetra 135 vjet. Në brendësi të pyllit ka dhe livadhe me bimësi barishtore.
Në pyll takohet ariu, ujku, dhelpra, lepuri i egër, kaprolli, thëllëza e malit, mëllënja etj. Pylli ka edhe vlera turistike. Ky monument mund të vizitohet, duke ndjekur rrugën automobilistike rurale 45 km të gjatë Çorovodë – Gjerbës – Zhepë dhe në vazhdim rrugën këmbësore (6 km) nga Zhepa për tek Guri i Prerë.